Segundo os nacionalistas o Bar Anchoas é moito máis ca un simple establecemento, “forma parte da memoria colectiva de xeracións de monfortinos e monfortinas que o vincularon a momentos de lecer, festas e veráns á beira do río. A súa posible desaparición supón unha perda irreparable para o patrimonio social e emocional da cidade”.  

O BNG propón que o Concello, en colaboración coa Oficina de Rehabilitación do Casco Histórico, negocie coa Confederación Hidrográfica a instalación dun kiosko municipal que manteña a esencia deste espazo. Propoñen un deseño adaptado á zona protexida, unha concesión pública transparente mediante concurso e manter así a mellora do Malecón como espazo de convivencia e atractivo turístico.  

Emilio J. Sánchez, voceiro do BNG, subliñou que “non podemos permitir que se perda un símbolo da identidade monfortina sen esgotar as opcións legais. Hai precedentes de kioskos concesionados noutras cidades; é cuestión de vontade política”.  

María José Vega Buján, exconcelleira do BNG, lembra que xa presentaran un proxecto á Confederación Hidrográfica, “pero quedou sen resposta, daquela era Liñares presidente da Confederación. Agora podería ser o momento de retomalo con determinación”. O BNG fai un chamamento ás demais forzas políticas a sumarse a esta proposta, que combina o respecto polo río e a defensa do patrimonio inmaterial da cidade.