O Centro Comercial Urbano (CCU) de Monforte arrinca esta segunda quincena do mes de xuño cun programa de actividades pensadas para dinamizar a cidade, atraer visitantes e seguir ofrecendo valor ao comercio local. “Tres accións complementarias, dirixidas a públicos diferentes, marcarán un comezo de verán cheo de enerxía“, comentan dende a xerencia ao tempo que lembran que “todas as actividades están organizadas polo CCU de Monforte, co apoio da Xunta de Galicia e a colaboración do Concello”.
CURSO DE INGLÉS COMERCIAL
O CCU ofrece aos comerciantes asociados unha interesante e práctica formación para reforzar o nivel de inglés de cara a atender aos turistas e visitantes que chegan, cada vez en maior medida, á Ribeira Sacra. Así, pois, o martes 17 de xuño celebrarase unha formación exprés de 2 horas, exclusiva para socios e totalmente gratuíta, pensada para mellorar a atención ao cliente estranxeiro nos comercios de Monforte. “Unha aposta clara pola profesionalización e adaptación á chegada de visitantes internacionais”, comentan dende a xerencia.
ACTIVIDADES DE LECER PARA DARLLE A BENVIDA AO VERÁN
FESTA DE FIN DE CURSO. DESCONECTA CO CCU!
O sábado 21 de xuño terá lugar na Praza da Compañía a primeira edición dunha actividade familiar pensada para dar a benvida ao verán. A xornada preséntase como unha oportunidade de lecer en familia na que se poderá gozar con 20 xogos tradicionais de madeira, inchables espectaculares e unha festa da escuma como peche.
Para acceder ás actividades será preciso presentar tickets de compras realizadas nos establecementos asociados ao CCU por un importe mínimo de 10€, válidos con data do 26 de maio ou posterior.
No que respecta ao horario, a actividade terá lugar de 11:00 a 14:00 h. pola mañá, e de 17:00 a 20:00 h. pola tarde.
A TIROLINA DO CCU
Está programada do 24 ao 28 de xuño, como cada ano, na Praza da Compañía. Ademais da Tirolina Dobre haberá Rocódromo e Karts a Pedais. É a oitava edición dunha actividade xa icónica en Monforte, pensada para todos os públicos e con acceso totalmente gratuíto para quen merque nos máis de 150 establecementos asociados ao CCU.
Horario: de 11.00 h. a 14.00 h. polas mañás; e de 19.00 a 24.00 h. polas tardes.
“Estas tres propostas resumen o espírito do CCU: dinamización, promoción do comercio de proximidade e mellora continua dos negocios locais. Queremos que Monforte sexa un destino onde mercar sexa tamén unha experiencia”, afirma Ángel Folgueira, xerente da asociación.
