Durante o mes de xuño xa se desenvolveron dúas actividades do programa Descubrir Quiroga, dúas etapas do Camiño de Inverno e este domingo, 29 de xuño, terá lugar a ruta, o Camiño do Ferradal. As propostas que agora seguirán nos próximos están financiadas pola Concellaría de Turismo de Quiroga en colaboración coa Deputación de Lugo.
O concelleiro de Turismo, Vicente Parra, destaca a importancia deste tipo de actividades para que as poboacións rurais non decaian, “O obxectivo é que Quiroga e o Xeoparque Montañas do Courel atraian turismo, un turismo sostible de pequenos grupos”.
Os roteiros do programa Descubrir Quiroga, teñen por finalidade, dar a coñecer o patrimonio natural, cultural, gastronómico e etnográfico quirogués e do Xeoparque Montañas do Courel, ademais de crear mercado turístico, conseguindo que os visitantes se acheguen a comer, a durmir e a realizar rutas durante varios días.
Natureza única e salvaxe -en terra (rutas), aire (parapente) e auga (piragüismo e barranquismo)-; cultura e historia, artesanía local conforman este programa de dinamización turística que tamén se achega á gastronomía.
Acompañaron a Vicente Parra na presentación das actividades, o Alcalde de Quiroga, José Luís Rivera, a Concelleira de Igualdade, Educación e Infancia, Maite Pérez Grao; e o presidente do Xeoparque Montañas do Courel, Roberto Castro. Castro amosou o apoio a esta iniciativa por servir de axuda ao desenvolvemento sostible do territorio, poñendo en valor un dos grandes potencias do xeoparque, o patrimonio.
