O Concello da Pobra do Brollón non fallará á súa cita co Día do Orgullo LGBTIQ+, se ben este ano farao adiantando a celebración ao venres 27 de xuño.

A partir das 20:00 h. terá lugar a inauguración da exposición ‘Saír da norma’, unha mostra onde poder afondar máis no concepto de diversidade sexual e de xénero. “Desvelaremos o mecanismo que opera detrás do que chamamos ‘normal’ e coñeceremos persoas referentes no panorama galego actual”, comentan dende o concello.

A continuación organizarase unha mesa redonda baixo o título ‘Desviar as letras, diversificar a memoria’. Estará moderada por Branca Albán (Coop. Outonía) e nela confluirán diversas voces en torno á importancia de visibilizar ao colectivo LGBTIQ+ nas ruralidades a través da oralidade, a poesía, os contos, a performance, a música…

Os actos rematarán co recital poético-musical ‘Os nomes íntimos’, da man de Lucía Aldao e Samuel Merino.