Este encontro contou coa participación de militantes do municipio, do alcalde de Láncara, Darío Piñeiro e do tenente de alcalde e deputado provincial, Pablo Rivera. A nova Secretaría Xeral estará liderada por Alba Sangil, actual concelleira de Desenvolvemento Local, Cultura, Deporte, Medio Ambiente, Participación Veciñal e Novas Tecnoloxías. Como secretario de Organización continuará Juan José Díaz Gómez, concelleiro de Réxime Interior e Facenda Local e exdeputado provincial, achegando a súa ampla experiencia. Ademais, José Manuel García Aldegunde, concelleiro de Medio Rural, Servizos Públicos Básicos e Mobilidade, será o novo secretario de Política Municipal.
A nova dirección local asegura ter como obxectivo “reforzar a intensa acción de goberno desde o partido e continuar fortalecendo a agrupación socialista de Láncara, cunha aposta clara polo compromiso coa veciñanza e a cohesión interna”. O alcalde, Darío Piñeiro, destacou “o importante papel que o partido desempeña no impulso de políticas transformadoras e no desenvolvemento do municipio”.
Mentres a agrupación socialista de Láncara asegura que nas próximas semanas incorporaranse cinco novos militantes, acadando así preto de 30 membros, “unha cifra histórica que reflicte a confianza que o proxecto socialista está a xerar na veciñanza”.
“A nova executiva local afronta esta etapa con ilusión, responsabilidade e o compromiso de continuar traballando para mellorar a calidade de vida no municipio, consolidando Láncara como un exemplo de boas políticas públicas”, conclúen.
