O inmoble, situado nunha zona neurálxica da vila, prestou servizo a xeracións de gandeiros e gandeiras ata o seu peche na década dos 90. Desde entón, “permaneceu abandonado e esquecido tanto pola Xunta de Galicia, anterior propietaria, como polos sucesivos gobernos municipais. Un edificio estratéxico para Taboada convertido nun símbolo do desleixo institucional”, engaden os socialistas que no mandato (2019–2023), cando estaban na oposición, impulsaron os primeiros pasos para a súa recuperación. “Tras moitas xestións e propostas, os socialistas conseguiron que o Concello adquirise o edificio á Xunta por algo máis de 20.000€, a pagar en dez anualidades. Un investimento asumible e intelixente que abría a porta a recuperar para a veciñanza un espazo público fundamental”, apuntan.

No actual mandato, coa chegada de Roi Rigueira á Alcaldía, o concello asinou coa Deputación de Lugo un convenio para financiar integramente a súa rehabilitación. Un total de 138.000€ que permitirán poñer en valor este edificio e integralo nunha área vital da vila, onde se atopan o centro médico, a residencia da terceira idade, o cuartel da Garda Civil, a Casa do Maior, o parque infantil e o Campo da Feira, entre outros servizos.

“Na miña opinión, a isto chámaselle traballar con vista e ter claros os plans de futuro. Identificamos unha oportunidade, pedimos que se aproveitase e, cando dependeu de nós, conseguimos a financiación necesaria para sacar o proxecto adiante”, afirmou o Alcalde e Secretario Xeral do PSdeG de Taboada, Roi Rigueira.

O prazo para a presentación de ofertas estará aberto ata o 20 de xullo. Desde o goberno local aseguran que xa pensan en futuras actuacións complementarias, “unha das prioridades será a reorganización das dependencias municipais, co obxectivo de facilitar a relación da veciñanza coa administración local, especialmente ás persoas maiores e con problemas de mobilidade. Premisa básica de todo goberno que se precie”, asegurou Rigueira.