O Clúster da Pizarra de Galicia promove unha iniciativa que premia a excelencia nos estudos concedendo “Premios aos Mellores Expedientes de Bacharelato” nas zonas de Quiroga, A Rúa e O Barco de Valdeorras.

O premio consiste nun diploma e un talón de 300 euros para cada alumno. En Quiroga o mellor estudante foi Ignacio Gonzalez Gómez, do IES de Quiroga, e na Rúa, Noa Fernández Fernández, do IES Cosme López.

Na zona do Barco de Valdeorras, dous alumnos do IES Martaguisela, Diego Nogueiras Pérez e Ana Ruiz Arias, conseguiron a mellor nota deste curso. Ao ter ambos a mesma cualificación, recibiron un diploma cada un e repartiron o premio en metálico.

Os catro tiveron notas medias en Bacharelato superiores ao 9,80. Unhas excelentes cualificacións que ratificaron posteriormente nas probas da ABAU.

O xerente do Clúster da Pizarra de Galicia, Severino González, foi o encargado de facer entrega dos cheques nos tres centros educativos.