O club ciclista DH Galicia, que vén organizando o evento desde 2012, ultima os preparativos dunha nova edición, con dúas xornadas de espectáculo deportivo nas rúas da vila. O 25 de xullo, o DIRT Vila de Sarria, unha proba de saltos e das acrobacias dos participantes, na rúa Marqués de Ugena; e o 26 de xullo, o DHU, nun circuíto por diferentes rúas da vila, entre o campo da feira ata O Malecón.
Os asistentes tamén poderán desfrutar doutras actividades complementarias como concertos e actuacións para todos os públicos, ademais dunha zona gastronómica.
O delegado territorial de Lugo, Javier Arias, felicitou á organización pola traxectoria desta cita que combina deporte, espectáculo e acción. “Esta proba estase a consolidar como unha referencia a nivel nacional na súa modalidade, cunha participación crecente e unha ampla repercusión mediática”, destacou o delegado.
O vicepresidente da Deputación de Lugo, Efrén Castro, valorou “o traballo do DHG na organización que fai de Sarria un referente estatal desta modalidade, xenera unha gran afluencia de persoas e dinamismo nestes días e proxecta a imaxe de Sarria, grazas á atención e ao interese que poñen na promoción mediática e audiovisual”.
