A actuación, consistente na rehabilitación integral da estrada LU-P-1005 foi adxudicada á empresa Obras e Saneamentos Galicia S.L., que executará os traballos nun prazo previsto de tres meses.

Segundo informan fontes da Deputación Provincial de Lugo, as obras abranguen a totalidade da estrada, desde o seu inicio no lugar de Trasar, na parroquia de Cartelos, ata o punto quilométrico 5,693, no lugar de Rañadoiro, xa no límite coa provincia de Ourense, atravesando tamén a parroquia de Furco. O proxecto inclúe ademais o acondicionamento de preto de 500 metros do ramal que une esta estrada co lugar de Trasar de Sabugueiro, na parroquia de Buciños, mellorando así tamén a conectividade dos lugares máis afastados.

No que respecta ás actuacións previstas, estas consistirán na reapertura de cunetas para mellorar a drenaxe, na reparación de afundimentos localizados que comprometen a estabilidade do firme e na repavimentación completa da vía. A finalidade dos traballos é mellorar a seguridade e garantir unha mellor conservación da infraestrutura.

Trátase dunha vía fundamental para as comunicacións internas do Concello de Carballedo e para a conexión entre núcleos rurais dispersos, ademais de servir como acceso habitual para os servizos e actividades agrogandeiras da zona.