O voceiro provincial popular, Antonio Ameijide, xunto á presidenta local do PP de Quiroga, Rosa Arza, e o voceiro municipal, Adrián González, comprobaron o estado de mantemento da LU-P-5001, entre Ponte Barreiro e Villarbacú, que está recén arranxada desde Villarbacú ao tanque de Bustelo, pero no cruce das Eiras, cara Fisteus, está en mal estado, “pero o punto que presenta maiores deficiencias é na Goia, onde baixou un pouco a estrada e para tentar arranxalo cubrírona con terra”.

Antonio Ameijide denuncia que “ninguén pode entender que José Tomé, o PSOE e o BNG teñan nesta situación esta estrada provincial”, xa que “o máis normal é que cando se realizan uns arranxos se realicen ben”.

Unha situación que se engade á da estrada provincial LU-P-5002, que dá acceso ao Miradoiro da Conchada, unha estrada da que recientemente tamén se denunciou o seu mal estado. Nesta estrada, tras percorrela, comprobouse como hai fochancas de grandes dimensións, sinalización en mal estado ou curvas sen barreiras de seguridade con caídas de varios metros.

Dende o Grupo Provincial Popular denunciou “que hai anos que non se realiza nin o máis mínimo traballo de conservación, porque fochancas deste tamaño non aparecen nunha semana nin nun mes, son anos e anos de abandono”.