A operación antidroga realizada en Monforte de Lemos o día 12, con oito detidos, saldouse coa incautación de 720 dose de cocaína, ademais doutras sustancias como haxix, marihuana e pastillas. Dos 8, só tres ingresaron finalmente en prisión.
Así o informa a Policía Nacional sobre un operativo destinado a desarticular varios puntos negros de venda. Dirixido polo Grupo Local de Policía Xudicial, contou co apoio da Xefatura Superior de Policía coa intervención da UIP (Unidade de Intervención Policial), o equipo técnico de Guías Caninos e tamén os integrantes da Policía Xudicial da Comisaría de Lugo.
A eles sumáronse o Grupo Local de Seguridade Cidadá e Policía Científica da Comisaría de Monforte de Lemos. Os axentes levaron a cabo rexistros simultáneos en catro vivendas sitas no mesmo inmoble da rúa Duquesa, atopándose en todas elas mercadoría para o tráfico de drogas, balanzas de precisión, utensilios de corte, pastillas e efectivo superior a dez mil euros.
O dispositivo prolongouse durante cinco horas, xerando unha gran expectación na cidadanía ante o despregamento de medios policiais. Os rexistros estendéronse igualmente a un coñecido local de hostalaría próximo ao inmoble.
En canto ás sustancias incautadas, ademais de haxix, marihuana e pastillas, destacan as doses de cocaína xa preparadas para a súa distribución e venda. Como resultado do operativo practicáronse sete detencións por tráfico de drogas e unha por resistencia e desobediencia.
