O Concello de Chantada celebrou do 21 ao 26 de agosto as súas Festas Patronais na honra á Virxe do Carme, seis días de actividades nos que as propostas musicais foron as protagonistas, contando con gran asistencia de público. Segundo o alcalde, xa en xullo chegou moita xente a Chantada, “Nunca vira tanta xente en Chantada e todo o mundo falando marabillas. Chantada é un polo de atracción turística, cada vez nos visitan máis e nos coñece máis xente. Funciona moito o boca a boca e as persoas que nos visitan falan do paseo fluvial, da zona antiga, dos balcóns adornados, do Folión de Carros, da Ribeira Sacra”.
Os primeiros concertos das Festas Patronais, tiveron lugar o xoves, 21 de agosto, na Praza de Catro Camiños, onde actuarían La Disquetera e Son de Rosas. O segundo día a música trasladaríase á Praza do Pavillón para celebrar o “Ata o Chan Festival”. O festival de DJ,s, que cada ano achega a Chantada artistas de primeiro nivel, resultou un éxito, “O Ata o Chan Festival foi un éxito, tanto de participación como no bo desenvolvemento do evento, polo que agradecemos o traballo da organización con Rubén González á cabeza”, destaca o concelleiro de Cultura, Manuel Diéguez.
Verbena Patronais Chantada 2025/ Concello de Chantada
Un dos días centrais das Patronais do Concello de Chantada foi o sábado coa celebración do Folión de Carros e a lectura do pregón, que daría Roberto Fernández, o fillo de Xilberto de San Pedro. Ofrecería un dos pregóns máis emotivos pola vinculación coa propia historia do Folión. Un desfile, o desta edición que o alcalde cualifica de “tremendamente estupendo”, polas características das propostas e o dinamismo co que se desenvolveu toda a axenda do desfile e actos posteriores.
O punto e final ás Festas Patronais de Chantada púxose este martes, festivo local no Concello e un día no que veciños e visitantes aproveitaron para saír á rúa. Durante o día ao Campo do San Lucas para celebrar a Festa da Empanada e pola noite nos concertos que despedirían as Festas na Praza de Santa Ana e en Xoán XXIII, “Na Festa da Empanada e nas actuacións da noite houbo moitisima participación. Coa Festa da Empanada seguiremos traballando para que se use máis o servizo de autobús e haxa menos vehículos, pero todo funcionou sen incidencias e coa cantidade de xente que tivemos hai que felicitar a todo opersoal do Concello que colaborou na organización. Sin eles non sería posible facer isto”, asegura o concelleiro de Cultura.
Festa da Empanada 2025 / Concello de Chantada
No balance da edición deste ano destaca tamén o éxito do XXXIV Certame de Bandas de Música que se celebrou o domingo na Paza do Cantón coa participación da Banda de Música de Chantada, a Banda de Música de Lantaño e a Banda de Música da comarca de Sarria. O Concello de Chantada pecha estas Festas coa cancelación da sesión de Fogos Artificiais, ante a vaga de lumes que se viñan padecendo. A organización agradece o apoio recibido por esta medida.
Verbena Patronais Chantada 2025/ Concello de Chantada
