A Xunta entregou este luns os diplomas ás persoas participantes no obradoiro dual de emprego Camiño de Santiago V de Sarria, financiado pola Administración autonómica con 412.000 euros e promovido polo Concello.
A directora territorial da Consellería de Emprego, Comercio e Emigración, Carmen José López, destacou no acto de clausura o traballo realizado polos participantes, en especial os avances na posta en valor do campo da feira, onde rehabilitaron dous pendellos e fixeron as canalizacións para cambiar a instalación da rede de electricidade, alumeado público e telefonía. Deste xeito continúan os labores de acondicionamento deste espazo realizados en anteriores edicións do obradoiro.
Outras actuacións foron a colocación de portas, xanelas e revestimentos de madeira na oficina de turismo; e a mellora estética en varias zonas do Camiño mediante a ocultación de contedores.
“O resultado destes traballos pon de manifesto o nivel da formación que se imparte nos talleres de emprego financiados pola Xunta”, dixo López, quen animou aos participantes a aproveitar os coñecementos adquiridos para abrirse paso no mundo laboral “e mesmo para explorar as posibilidades de emprender un negocio e sectores con moita demanda de profesionais”
