O BNG do Saviñao solicitaba, na moción presentada a pleno, instar á Consellería de Cultura e Turismo a realizar un estudo de conservación da Capela da Virxe da Guadalupe e unha diagnose das intervencións necesarias para a súa conservación e posta en valor. A moción aprobouse por unanimidade e, esta semana, o BNG defendía unha iniciativa, na Comisión de Cultura do Parlamento Galego, para instar a Xunta de Galiza a desenvolver as accións necesarias para a conservación e posta en valor da Capela. O Partido Popular rexeitou a iniciativa asegurando que a Xunta de Galiza intervirá sobre os bens patrimoniais do BIC Ribeira Sacra de maneira xerarquizada e priorizada.

Para Olalla Rodil, o compromiso coa Capela da Virxe da Guadalupe vai máis alá de que o Goberno galego desenvolva un Plan de investimentos no BIC, polo que avazou que o BNG estaría “vixiante” para que eses investimentos cheguen realmente e contribúan á recuperación e posta en valor do patrimonio da Ribeira Sacra, a comezar pola Capela da Virxe da Guadalupe.

A Capela, ubicada na parroquia de San Vitorio de Ribas de Miño, fai parte do conxunto de bens inmóbeis incluídos no expediente de catalogación da Ribeira Sacra como BIC.  O templo foi construído no século XVIII e, na actualidade, presenta un nal estado de conservación, principalmente na súa fachada.