No Obradoiro formáronse unha vintena de persoas nos módulos de Operacións auxiliares de acabados ríxidos e urbanización, Instalación e mantemento de xardíns e zonas verdes e Atención sociosanitaria a persoas dependentes en institucións sociais.

No Concello de Chantada rehabilitáronse os miradoiros do paseo fluvial facéndoos máis accesibles e co módulo de acabados ríxidos e urbanización tamén se creou unha plataforma para eliminar as barreiras arquitectónicas do parque Eloísa Rivadulla.

Coa formación de xardíns traballouse na conservación das zonas axardinadas do paseo fluvial e creouse unha nova área verde no barrio de Marín. O alumnado de Atención Sociosanitaria, tamén recibiu clases teóricas e prácticas que se desenvolveron na residencia de Carballedo, centrando a formación na atención ás persoas dependentes.

En Carballedo, rehabilitaron a casa reitoral de Santa Cristina de Asma e encargáronse do mantemento de xardíns e zonas verdes nos núcleos de Castro e A Barrela. No tocante a Taboada, acondicionaron un vial no núcleo urbano de Pacios e levaron a cabo o mantemento de zonas axardinadas na capitalidade do municipio, remodelando ademais de xeito integral dúas glorietas, unha na rúa Fenosa na súa intersección coa rúa Nova, e outra na rúa das Ínsuas na intersección coa rúa do Carballo.

Este taller ofrece a modalidade dual, o que supón que a Xunta concede incentivos para contratar a varios participantes en empresas da contorna para desempeñar funcións vinculadas ás ensinanzas impartidas. Estes contratos realízanse ao finalizar a actividade, cunha duración mínima de tres meses a xornada completa.

Do acto de entrega de diplomas para clausurar esta IX edición do Serra do Faro participaron, entre outros, o delegado territorial da Xunta en Lugo, Javier Arias, o alcalde de Carballedo, Julio Yebra, o alcalde de Taboada, Roi Rigueira, o alcalde de Chantada, Manuel Lorenzo Varela, acompañado do concelleiro de obradoiros, Diego Otero.