A mesa de seguridade para a celebración do San Mateo estableceu tamén a circulación polas pistas da concentración parcelaria da zona en dirección a Ribas Pequenas e Bóveda. Esta disposición do tráfico comezará ás 10.00 horas e estará vixente ata as doce da noite do domingo día 21. No caso de que a afluencia de vehículos o requira, prolongarase o tempo necesario durante a madrugada do luns 22.

O estacionamento só estará permitido nos espazos habilitados, de tal xeito que non se poderá aparcar en toda a pista que da acceso á zona da festa. A zona estará sinalizada e haberá un control de tráfico permanente.

O dispositivo de seguridade estará dirixido pola Policía Local, que contará coa colaboración da Policía Nacional e da Garda Civil de Tráfico. Os axentes da Garda Civil vixiarán as saídas e as entradas ao lugar da romaría. Ademais, a Policía Local velará pola seguridade do recinto da festa e dos seus arredores; tamén haberá efectivos da Policía Nacional. Neste senso, durante toda a xornada haberá unha patrulla tanto da Policía Nacional como da Policía Local permanentemente no espazo do evento.

Polo que respecta á noite previa á celebración da romaría haberá unha patrulla da Policía Nacional con presencia reiterada na zona. Cóntase tamén coa colaboración do persoal de Servizos á Cidadanía do Concello de Monforte. Co San Mateo remata a programación do Verán Cultural.