As obras xa completadas incluíron o arranxo de accesos a vivendas en Cadeiroás (Xián), A Casilla (Vilela), Zoás (Moreda) e Faquiós (Castelo), así como a mellora de varios tramos nas pistas que unen As Neves con Monterroso por Sambreixo e Bouzoa con Maxal. Ademais, executouse o arranxo integral da pista que conecta Friamonde e Couso, unha vía fundamental tamén como acceso ao miradoiro do Banco do Cuco, onde están previstas novas actuacións.
Así mesmo, avanzan as obras para recuperar a antiga Casa Escola de Meixonfrío, que, segundo os socialistas, “levaba moitos anos no máis absoluto abandono”, co obxectivo de convertela nun local social de referencia para a parroquia. As primeiras actuacións céntranse na cuberta e no reforzo da estrutura, e permitirán dotar á veciñanza dun espazo comunitario no que desenvolver reunións e actividades.
O alcalde e Secretario Xeral do PSdeG de Taboada, Roi Rigueira, salientou que “estas melloras resolven necesidades históricas da nosa veciñanza. Grazas ao apoio da Deputación, hoxe as parroquias contan con accesos dignos e seguros, e Meixonfrío terá pronto un local social aberto á cidadanía”.
Os socialistas lembran que “este convenio non é un feito illado, senón parte dunha colaboración continua entre a Deputación de Lugo e o Concello de Taboada”. Neste ano asináronse dous novos acordos, en marzo destináronse preto de 138.000 euros á rehabilitación do edificio da antiga Cámara Agraria, que se converterá nun local multiusos para a veciñanza. E en agosto aprobouse unha nova achega de 250.000 euros para mellorar camiños, acondicionar a contorna do miradoiro do Banco do Cuco, adquirir un novo tractor para o parque móbil municipal e reforzar distintos servizos locais.
Rigueira engadiu que “sen o compromiso socialista sería moi difícil acadar investimentos desta magnitude para o noso concello. Estas melloras amosan o valor da cooperación entre administracións socialistas: cando Concello e Deputación traballan da man, os proxectos fanse realidade e melloran a vida diaria da xente”.
Casa escola Meixonfrío / PSdeG Taboada
