Este xoves dará comezo o ciclo de representacións teatrais seleccionadas polo Concello de Monforte entre a ampla oferta que o AGADIC (Axencia Galega das Industrias Culturais) presenta cada semestre aos concellos adheridos a ese circuíto cultural.

Ese día, ás 20:15 h. represéntase no Edificio Multiusos da cidade do Cabe a obra “Fillos do sol”, da compañía Contraproducións. A peza está escrita e dirixida por Cándido Pazó e interpretada por César Cambeiro, Adrián Ríos e Alba Bermúdez.

Fillos do sol é unha elucubración dramática sobre a figura de Eduardo Pondal e a súa obsesión que ocupou toda a súa vida como escritor: Os Eoas.

Aproveitando o estreo da tempada falamos coa Concelleira de Cultura, Marina Doutón.

Desde cando está o Concello de Monforte na Rede Galega de Teatros e Auditorios do AGADIC?

O Concello de Monforte de Lemos forma parte da Rede de Teatros desde que se creou no ano 1996, aínda que a nosa cidade xa participaba noutras redes antes da creación do AGADIC.

Había moita oferta teatral para o primeiro semestre do ano?

A oferta teatral é moi ampla e variada todos os anos, aproximadamente visualizamos unhas 300 obras, e dende o Concello optamos por aquelas que son máis axeitadas, tanto pola súa temática como polo seu custe.

Como é o proceso de escolla das obras? Porque entendo que todas non se poden ver.

Unha vez visualizada a oferta, seleccionamos as obras tendo en conta os intereses do público en xeral e por outra parte, valoramos as diferentes conmemoracións, polo que a temática é bastante variada.

A decisión final na selección sae do consenso entre técnico e concelleira de cultura?

Efectivamente, tendo en conta todos os elementos de valoración cos que contamos sobre as obras que se ofertan.

Como valoras o seguimento que ten o teatro entre os monfortinos e monfortinas? Son máis de comedia ou de drama, que opinas?

A acollida é moi boa, temos un público fidelizado que asiste sempre ás diferentes obras e tamén observamos que vai aumentado o número de asistentes e, por outra parte, estamos intentando chegar ós centros de ensino.

En canto o xénero observamos que tanto a comedia coma o drama teñen boa acollida, sempre que a obra teña calidade.

Non cres, sinceramente, que se podería sumar máis xente os xoves de función no Multiusos?

Sempre se pode sumar máis público, como non, pero estamos satisfeitos co resultado que teñen as obras representadas no edificio Multiusos.

Que falta, máis calidade nas obras ou máis inquietude e fidelidade nos espectadores?

Consideramos que a calidade das obras teatrais é boa xa que é a oferta que se pode ver en Monforte e tamén no conxunto de Galicia; e polo que respecta ós espectadores adoita haber un público fiel que acude a estas citas culturais, nun número moi relevante para unha cidade mediana como é a nosa.

En canto á fidelidade, como dixen antes xa temos conseguida unha parte importante de público asiduo, agora ben, sería interesante poder seguir aumentando o número de asistentes.

Que xéneros nos esperan ese semestre?

Os xéneros deste semestre van dende a comedia, pasando polo drama e tamén obras de carácter social. En canto ás obras para o público infantil escollemos unha obra de implicación da nosa lingua galega e na posta en valor da diversidade, e outra obra aposta polo valor e a visibilización da problemática do medio ambiente.