A proposta de Na casa delas chega da man do cuarteto vocal Son de corda no que cantan a poetas luguesas, concretamente, á guímara Olga Novo, a María Mariño, Luz Pozo, Xela Arias, Marica Campo e Olalla Cociña. No repertorio tamén inclúen algún texto da tradición oral lucense.  

Textos nos que ‘converxen diferentes tipos de amor, medos, incertezas e desenganos que enchen a cunca da vida’, escribe Beatriz Dourado na presentación do proxecto.

O cuarteto estará acompañado por Raúl Rodríguez no piano e a bailarina, María Pichín. Ademais, durante o concerto proxectarase unha serie de vídeos dedicados ás poetas, realizados por Alejandro Gándara e Manuel Lucas.

O proxecto Na casa delas conta coa colaboración da Asociación de Escritoras e Escritores en Lingua Galega, da Vicepresidencia da Deputación de Lugo e do Concello da Pobra do Brollón