O popular barrio de Carude, en Monforte de Lemos, vivirá este sábado unha xornada festiva que imitará o popular ‘Oktoberfest’ alemán que se está exportando xa a todos os recantos do mundo. Neste caso chamarase ‘Ok(c)toberfest’, está organizado pola Asociación de Veciños de Carude, e contempla actividades dende as 13:00 ata as 20:00 h.
Segundo nos conta Juan, da organización, a idea xurdiu “para dinamizar o barrio que está quedando sen movemento comercial e cremos que hai que darlle vida dalgunha maneira”. Así mesmo, comenta, “aproveitando que a decidimos facer este mes pensamos que unha festa imitación ao oktoberfest alemán, que se organiza xa en moitos sitios, podía ser unha novidade que lle guste á xente”.
Segundo nos explica tamén o noso interlocutor, no espazo onde se fai a festa haberá música en directo, unha carpa, barra e mesas para que a xente que se achegue poda degustar varias cervexas extranxeiras –2 alemanas, 1 italiana e outra belga–, e comer, salchicas e panceta. Ademais, haberá cervexas 0’0, auga e refrescos.
A festa, que comezará cunha ‘sesión vermú’ e rematará cun ‘tardeo’ na zona da ‘Capilla de Carude’, inclúe na programación o concerto do grupo ‘Segunda Parte’ ás 13:30 h., unha sesión de xogos populares e sorteos para a cativada a partir das 16:30 h.; e o concerto do grupo ‘Dinosaurios’ ás 18:00 h.
OS GRUPOS MUSICAIS
Segunda parte é unha formación musical monfortina de recente creación, que fai versións pop-rock e que conta con músicos (profesores e alumnos) da academia I-Creativa que se estrearon o pasado verán no ciclo de concertos por barrios que patrocina e organiza o Concello de Monforte. Curiosamente, tres dos compoñentes don do barrio de Carude.
Dinosaurios é un grupo de Monforte de Lemos que fai versións de pop-rock en castelán cun repertorio no que se atopan principalmente cancións do panorama musical dos 80-90 aínda que tamén se inclúen algúns máis actuais. Así, o público poderá escoitar dende ‘Radio Futura’, ‘Leño’ e ‘Los Ronaldos’, ata ‘M Clan’ ou ‘Los Zigarros’.
