A voceira municipal do PP, Katy Varela, sinala que o Concello de Monforte de Lemos carece dun PXOM actualizado e adaptado á Lei do Solo de Galicia e á normativa estatal vixente. “Esta situación provoca un marco de inseguridade xurídica, limita o desenvolvemento económico e urbanístico, frea o asentamento de novas actividades empresariais ou residenciais e dificulta a execución de proxectos tanto públicos como privados”, afirmou.

Segundo os populares, o PXOM constitúe o principal instrumento de ordenación urbanística dun municipio xa que nel se regulan, entre outras cuestións, a clasificación e cualificación do solo, planifícanse os usos do territorio, defínese o modelo de crecemento e organízase o desenvolvemento sostible do termo municipal.

Ante esta situación, “non se explica que este equipo de goberno sexa tan proclive a realizar obras de urbanismo, como as urbanizacións nas zonas denominadas C ou D no centro urbano ao carón do río, e non se decida a aprobación do PXOM, o que denota que é dunha absoluta irresponsabilidade abrir rúas e zonas urbanas novas sen ter aprobado un plan de urbanismo primeiro”.

A iniciativa que defenderán os populares no pleno contempla:

• Instar ao equipo de goberno do Concello de Monforte de Lemos a iniciar de inmediato a redacción dun novo Plan Xeral de Ordenación Municipal (PXOM), como instrumento esencial para o desenvolvemento urbanístico, económico e social do municipio.
• Elaborar e facer público un calendario de traballo que recolla as distintas fases do procedemento de elaboración e tramitación do PXOM (avance, aprobación inicial, exposición pública, aprobación provisional e aprobación definitiva), cos prazos estimados para cada unha delas.
• Garantir a participación da veciñanza, asociacións, colectivos sociais e axentes económicos mediante a celebración de xornadas informativas, consultas públicas e a habilitación de canles para a presentación de propostas e alegacións ao longo de todo o proceso.
• Dotar unha partida específica nos orzamentos municipais destinada á contratación de equipos técnicos especializados para a redacción do PXOM, así como para os traballos e informes necesarios.
• Dar traslado deste acordo á Consellería de Medio Ambiente, Territorio e Vivenda da Xunta de Galicia, solicitando a colaboración e asesoramento técnico para a correcta elaboración do novo plan