Os nacionalistas demandan que se dote de persoal e medios humanos suficientes o centro hospitalario, denunciando que “o Goberno galego aproveita períodos afastados das eleccións para acelerar o proceso de deterioro e privatización da sanidade pública no Sur de Lugo”.
Aseguran que a falta de especialistas en Pediatría, Oftalmoloxía e Neuroloxía é insostible, “pois non se cobre nin con desdobres desde Lugo nin coa incorporación de novos profesionais. Todo isto forma parte da folla de ruta do PP para derivar pacientes á sanidade privada e afondar no desmantelamento do servizo público de saúde”, advirten desde o Bloque.
Levan anos anos baleirando de especialistas o Hospital de Monforte, pero en períodos afastados das eleccións a aceleración é evidente, e iso é o que está a pasar agora”, denunciou Rosa Ana Prieto, responsable da organización nacionalista nas comarcas do Sur de Lugo.
Durante a concentración gardarase un minuto de silencio en apoio ás mulleres andaluzas vítimas dos erros nos cribados do Servizo Andaluz de Saúde, “tamén inmerso nun proceso de privatización e adelgazamento do público en favor do negocio privado”.
Á mobilización asistirán o deputado chantadés Iago Suárez, que dará lectura a un breve manifesto; o alcalde da Pobra do Brollón, Xosé Lois Maceda; e o portavoz do BNG en Monforte, Emilio J. Sánchez Iglesias, xunto con outros cargos orgánicos e representantes institucionais do Bloque nas comarcas do Sur de Lugo.
