Morriñas de castaña S.L., unha nova firma empresarial que elabora produtos derivados deste froito típico do Courel, vén de presentar novidades na prestixiosa feira Etiqueta Negra, un escaparate comercial celebrado do 8 ao 10 de novembro no Recinto Feiral de Pontevedra. Concretamente, deu a coñecer ao público dous novos sabores das súas galletas gourmet elaboradas con fariña de castaña, sen conservantes e sen glute: chocolate branco con pistacho e chocolate negro con abelá.
Morriñas de castaña, nacida en Folgoso do Courel, é unha nova marca que ten detrás a historia dun obradoiro familiar que transforma a castaña, din, “co obxectivo de converter ese sabor auténtico nunha experiencia gourmet, respectando a artesanía, a calidade e a sustentabilidade”.
NOVOS SABORES QUE CHEGAN TRAS MESES DE EXPERIMENTACIÓN
Durante a presentación en Etiqueta Negra, os fundadores explicaron que estas novas galletas son o resultado de meses de experimentación nos que foron combinando no seu obrador o sabor natural e meloso da castaña con contrastes modernos e sofisticados. “A versión de chocolate branco con pistacho ofrece un perfil suave e cremoso, mentres que a de chocolate negro con abelá achega intensidade e un toque torrado”, explican.
Tanto as galletas clásicas, como estas que incorporan novos sabores, están dispoñibles en diferentes tendas gourmet de Galicia.
COMPROMISO CO TERRITORIO
“Cada ‘Morriña’ leva un anaco da nosa terra… e devolve vida ós nosos soutos”, destacan desde a marca lembrando que parte dos beneficios de cada venda destínanse a proxectos de reforestación de castiñeiros en soutos galegos.
