Segundo informan fontes da Vicepresidencia da Deputación de Lugo, e con resolución provisional publicada na BOP coa listaxe de entidades beneficiarias e contías concedidas, concedéronse 295 subvencións (39 máis que na pasada anualidade), que están destinadas a financiar gastos relacionados coa organización de actividades culturais en todo o territorio da provincia.
A deputada de Cultura Iria Castro explicou que “a resposta á convocatoria reflicte o crecente dinamismo das asociacións, unha rede fundamental para facilitar o acceso á actividade cultural e crear espazos de socialización e convivencia, especialmente nas parroquias e concellos máis pequenos”.
A resolución devandita, publicada o martes 25 de novembro no Boletín Oficial da Provincia, será definitiva transcorrido o prazo de 10 días que hai para a presentación de alegacións.
AXUDAS PARA EQUIPAMENTO E MELLORAS
Do mesmo xeito que as subvencións anteriores, tamén se publicou no BOP cales son as entidades beneficiadas e as axudas destinadas a equipamento e melloras en locais de uso cultural. Nesta liña de achegas hai máis de 200 asociacións culturais beneficiarias e cóntase cun investimento de 185.000 euros.
