Primeiro foi ‘Alvorada’, despois seguiulle ‘Metamorfose’, e agora chega a terceira peza final da triloxía audiovisual do artista quirogués ‘Peitoescuro’ dirixida tamén polo produtor Álex Baena. O título escollido para este videoclip é ‘Pan das pedras’ e poderase ver en primicia na Pobra do Brollón, concretamente no espazo multiusos da aldea de Salcedo.

O pase está programado para as 20:00 h. e haberá algúns petiscos para compartir entre os presentes na cantina da Salanova, segundo explica Rubén Gutiérrez, ‘Peitoescuro’.

Coa presentación oficial de ‘Pan das Pedras’ queda xa o camiño aberto para “Semente na fenda”, o título do álbum de estudio no que Peitoescuro explorará artísticamente “a escuridade necesaria para enraizar e espertar do letargo en busca da luz”.  A previsión para o seu lanzamento é para principios do vindeiro ano.

O consolidado produtor compostelán e colaborador habitual de Tanxugueiras, Iago Pico, comandará a produción musical deste traballo que, a entender do grupo de traballo, “xerará gran expectación entre público e promotores”.