A conselleira de Medio Rural, María José Gómez, definiu estes galardóns -aos que este ano concorreron máis de 40 proxectos- como “unha mostra viva de que aquí hai xente capaz de transformar o presente e de deseñar o futuro con forza e con visión”. Asemade, indicou que ao longo dos anos os premios convertéronse nun símbolo de compromiso e nun recordatorio de que o desenvolvemento sostible é posible cando administracións, profesionais e sociedade civil “camiñamos da man”.
Sobre as diferentes categorías destes recoñecementos, a conselleira subliñou que as iniciativas de mocidade amosan unha xeración nova que aposta polo futuro; as propostas de interese social “lembran que a solidariedade e o benestar comunitario poden construírse desde aquí, con modelos de economía social e servizos de proximidade” e no sector agroalimentario, salientou que se premian modelos circulares, ecolóxicos e integrados, que producen con calidade. Na categoría de mulleres, lembrou que se poñen en valor as que lideran transformacións profundas; no eido da innovación tecnolóxica, destácase o seu potencial para mellorar procesos e reducir custos; e no ámbito da recuperación de terras, son iniciativas que -remarcou a conselleira- evitan o abandono e que falan dun rural “vivo e cheo de oportunidades”.
Dentro da categoría de proxectos de interese social, premiouse co segundo posto ao Club Fluvial de Monforte: deporte, inclusión e cohesión social para dinamizar o medio rural. O Club Fluvial de Monforte é o único complexo acuático e deportivo de referencia na comarca da Ribeira Sacra e en todo o sur de Lugo, con máis de 40.000 m² xunto ao río Cabe.
Na categoría de recuperación e posta en valor da terra agraria recibu o primeiro premio, Enonatur, de Chantada. A iniciativa, presentada polo enólogo, Roberto Regal, céntrase na recuperación de viñedos en risco de desaparición e na posta en valor da viticultura heroica na Ribeira Sacra, apostando pola produción de alimentos de alta calidade e identidade, recoñecidos como artesanía alimentaria.
Enonatur Premios AGADER 2025 / Consellería Medio Rural
Enonatur, propón o apadriñamento de viñedos en risco de abandono, contribuíndo a preservar o territorio. Vinifica de forma independente na adega a colleita de cada unha desas parcelas e finalmente entrega cada viño coa súa propia identidade. Unha experiencia vitivinícola na que o cliente pode ser partícipe na medida en que queira, incluso realizando traballos en viña, creando así un vínculo coa terra.
Regal, agradece este recoñecemento “logo de 25 anos traballando a prol do territorio” e destaca o“potencial do medio rural galego, “pode transformar en proxecto de vida iniciativas comprometidas co seu desenvolvemento e que preserven a súa identidade”.
