O Concello de Monforte de Lemos comezou o pasado 21 de novembro unha interesante iniciativa: levar demostracións de cociña profesionais ás parroquias.
O programa alongarase ata o 5 de decembro completando un total de seis xornadas (días 21, 22, 27, 28 de novembro e 4 e 5 de decembro) nas que os ‘showcooking’ se van desenvolvendo en distintos locais sociais do Concello. Un chef profesional imparte estes obradoiros de cociña elaborando receitas con produtos do outono: cogomelos, castañas, verduras… Unha degustación conxunta das tapas ponlle remate ao encontro gastronómico.
Esta actividade, que se desenvolve en horario de 19:00 a 21:00 h., ademais de ensinar algunhas técnicas e receitas do chef, serve para dinamizar o rural socializando e dálle uso aos locais sociais que teñen as parroquias participantes. O acceso a estes obradoiros é gratuíto, con 25 prazas dispoñibles en cada un deles que se completan o mesmo día da actividade no local social que corresponda.
DESENVOLVEMENTO DA ACTIVIDADE
Os locais sociais participantes nesta programación son: Santa Mariña, Seoane, A Penela, Distriz, Chao do Fabeiro e Sindrán.
Nos obradoiros celebrados nos de Santa Mariña e A Penela, os días 21 e 22 de novembro, estivo presente o Concelleiro de Medio Ambiente, Obras, Medio Rural e Servizos, José Luis Losada. Segundo puido comprobar, houbo éxito de participación e os asistentes agradeceron que se leven este tipo de actividades ao rural.
Os vindeiros ‘showcooking’ serán os días 4 e 5 de decembro e realizaranse nos locais sociais de Distriz e Sindrán respectivamente.
A actividade está financiada polo Concello de Monforte e o Ministerio para a Transición Ecolóxica e o Reto Demográfico.
