A montaxe de Nadal en Chantada inaugurarase este venres, 5 de decembro, ás 20:30h. co acendido das luces e a apertura do Poboado de Nadal que se instala na Praza do Mercado e na Praza da Paz.
Desde o Concello de Chantada séguese ampliando cada ano a decoración e a iluminación da vila polo Nadal, “Seguimos a liña doutros anos, colocamos 120 arcos luminosos, aumentamos os metros de guirnalda de decoración. Este ano, entre as novidades, iluminamos a zona do Parque da Alameda, nas árbores colócase a decoración que identifica ás 36 parroquias do concello e ilumínanse as varandas da ponte que leva ao muíño”, explica o alcalde de Chantada, Manuel Lorenzo Varela.
Na Praza de Galicia colocarase, como é costume, a árbore de Nadal e espazos para photocall. Tamén a Praza de Santa Ana contará con decoración que vestirá a vila de celebración para a dinamización da hostalaría e do comercio e para levar a ilusión destas Festas aos/ás máis cativos/as.
O rexedor convida a participar do acto de apertura do Nadal en Chantada, que terá lugar ás 20:30h na Praza do Mercado, “O ano pasado moitas familias con seus fillos/as participaron desta celebración da apertura do Poboado e inauguración da iluminación. Para o acendido deste venres, facemos un chamamento a que nos volvan a acompañar as familias e toda a veciñanza para abrir xuntos un novo Nadal”.
Nesa xornada, ás 18:00h, a Biblioteca Pública Municipal acollerá unha sesión de contacontos con Lalá Teatro, que nos achega “A carta de Nadal”, un contacontos interactivo, dirixido a maiores de tres anos que adentrará aos nenos/as na maxia do Nadal.
Despois da inauguración da decoración e do alumeado de Nadal, a seguinte cita da programación destas Festa en Chantada, será o venres, 19 de decembro, cunha nova sesión de contacontos na Biblioteca Pública Municipal. Ás 18:00h os/as nenos/as de 1 a 4 anos coñecerán, Leo e o Nadal.
As seguintes propostas terán lugar no Auditorio Municipal, o luns, 22 de decembro, ás 18:30h proxectarase a película de animación, Noite de Paz, Holy Night. O venres 26, ás 18:30h a proposta é de comedia e acción co filme, Red-One. O día 27 de decembro desde as 19:00h ofrecerase o espectáculo de circo e comedia, Mayday e o 30 de decembro, tempo para a música con Gramola Gominola desde as 18:30h.
Antes de rematar o 2025 a programación do Concello de Chantada tamén inclúe propostas deportivas e o 27 de decembro desde as 17:15h correrase a II San Silvestre no corazón de Galicia na que non faltarán ducias de corredores/as con disfrace de Nadal para seguir creando o ambiente destas Festas.
O novo ano abrirase coa sesión de contacontos, A osiña amorosa, Gemola volve polo Nadal, que se celebrará o venres, día 2 de xaneiro, na Biblioteca Pública Municipal. A Cabalgata de Reis celebrarase o 5 de xaneiro desde as 18:30h. Despois do desfile polas rúas da vila, as Súas Maxestades recibirán ás nenas e nenos no Auditorio Municipal.
A programación de Nadal no Concello de Chantada complétase cos Campamentos e Obradoiros infantís para favorecer a conciliación durante estas festas. Estas actividades teñen aberto o prazo de inscrición ata o 10 de decembro nas oficinas de Servizos Sociais do Concello.
