A sección segunda da Audiencia Provincial de Lugo ditou sentenza absolutoria para un matrimonio de Monforte acusado dos delitos de apropiación indebida e estafa.

A Sala conclúe que non hai probas de que enganasen a un octoxenario, xa falecido, para que lles entregase o diñeiro, nin que se apropiasen del de maneira ilícita. Os feitos remóntanse ao ano 2013 cando o home se foi a vivir cos seus veciños para que o coidasen a cambio dunha retribución económica de 470 euros mensuais que lles daba o neto do home.

Entre novembro de 2016 e xaneiro de 2017 o ancián retirou da súa conta máis de 50.000 euros en tres pagos diferentes, feito que denunciaron tanto o neto como a súa nai cando este faleceu, en 2021.

Para o tribunal, a proba testemuñal presentada foi considerada insuficiente e de carácter indirecto, xa que se baseaba en declaracións de testemuñas que non presenciaran directamente os feitos.

Ademais, na sentenza destácase que o falecido mantiña unha capacidade de xestión do seu patrimonio e que non existía constancia de reclamacións previas ao ano 2019 sobre o diñeiro supostamente apropiado. A sentenza non é firme, pois cabe presentar recurso ante o Tribunal Superior de Xustiza de Galicia.