O 112 Galicia tivo constancia do suceso ao redor das 11:35 horas deste martes, a través dunha alerta emitida polo sistema de emerxencias dun ‘smartphone’ que indicaba que o seu propietario sufrira un accidente.

“Aínda que se tentou establecer contacto con el, non foi posible nun primeiro momento, polo que se iniciou de inmediato a mobilización dos recursos de emerxencia”, explica o 112. Minutos despois, un particular que circulaba pola zona confirmou a saída de vía do camión e indicou que o condutor podería atoparse atrapado.

Unha vez no lugar, o persoal sanitario decidiu mobilizar o helicóptero medicalizado con base en Ourense para trasladar ao ferido ao hospital tras ser excarcerado polos servizos de emerxencia. Foron avisados 061, Bombeiros de Monforte, GES de Quiroga e Garda Civil de Tráfico.