O delegado territorial da Xunta en Lugo, Javier Arias, visitou este martes algúns dos establecementos que se acolleron en 2025 a estas axudas con motivo da nova convocatoria que está aberta e que está dotada con preto de 4 millóns de euros. Con este tipo de apoios o Goberno galego financia iniciativas de dixitalización, innovación e sustentabilidade ambiental promovidas por negocios locais e artesanais.

Arias coñeceu os proxectos desenvolvidos en Monforte por The Closet e Gourmet Gallego, adicados respectivamente á venda de moda e alimentación. Neste municipio concedéronse trece axudas. Tamén hai dúas firmas beneficiarias en Quiroga e unha en Chantada, Carballedo e O Saviñao, respectivamente.

Este programa abrangue tres liñas de financiamento compatibles entre si. Unha delas está orientada á dixitalización e á innovación comercial; a outra á modernización das instalacións e unha terceira á sustentabilidade ambiental no emprego de embalaxes.

Entre as novidades deste ano destaca a simplificación administrativa e a axilización do procedemento de concesión e dos pagamentos anticipados. Tamén se amplía o período subvencionable para atender todas as actuacións realizadas desde o fin do prazo marcado na orde anterior, o 25 de outubro de 2025.

Arias destacou que esta iniciativa enmárcase no Plan Estratéxico do Comercio de Galicia 2025-2030, que recolle 74 accións específicas para promover un sector clave para a economía da Comunidade.