En Taboada quentan xa motores para a celebración da XXXIV edición da súa emblemática Festa do Caldo de Ósos coa presentación da imaxe representativa do evento, unha obra do artista gráfico Antón Lezcano.
En palabras do concelleiro de festexos, Manuel Diéguez, a obra é “unha imaxe chea de forza na que a estrela é a pota/porquiño, da que sae un fume engaiolado de tradición, coma a burbulla que leva a cunca onde se serve o caldo”.
A festa, que terá lugar a fin de semana do 14 e 15 de febreiro, enxalza o prato máis típico de Taboada que é o “Caldo de ósos”. Segundo se di no lugar, se o atopas noutro sitio, é porque alí instalouse un veciño de Taboada. A súa orixe remóntase as antigas matanzas, cando se aproveitaban os ósos da soá do porco para facer un xantar contundente contra o frío.
Na presentación, o tenente de Alcalde, José Portela; e o concelleiro de Cultura, Rural e Deportes, Manuel Diéguez, explicaron que en vindeiras datas desvelarán o nome do pregoeiro ou pregoeira e darán conta do programa festivo e cultural.
