A familiar desta paciente, segundo relatan, insultou e fixo outras increpacións no pasillo e na habitación, cuestionando o traballo dos profesionais e con ameazas telefónicas a enfermaría unha vez que a paciente foi dada de alta. Segundo a xunta de persoal, esta situación nun contexto de alta carga de traballo “fixo que incluso unha das traballadoras se vira obrigada a ausentarse e coller unha baixa. Non é un feito illado, só o máis recente. O peor é que sucesos que antes eran anecdóticos, estanse a converter no habitual”.
Lembran que ninguén está a salvo de ser increpado, “como mínimo, polos usuarios dun sistema cada vez máis sobrecargado, que dirixen a súa rabia cara as persoas equivocadas. O que ocorreu en medicina interna só foi a gota que colmou o vaso”.
Nesta situación, unha representación dos traballadores de medicina interna tiveron unha reunión coa xerencia do Hospital. Aseguran que lonxe de dar solucións reais, “achacou estes episodios a un problema sociolóxico que ía máis alá do ambiente hospitalario, e instou ós traballadores a acostumarse a este tipo de situacións, porque cada vez van ser máis habituais”. No encontro afirman que se lle propuxo ao persoal formarse en “técnicas de comunicación, ser máis asertivos e intentar conter a agresión, poñendo o foco na vítima en lugar de aportar solucións reais que protexan ao traballador nunha situación de perigo”.
No comunicado que remite a CIG Saúde anuncian concentración o día 13 de febreiro, ás 12:00 horas, diante da entrada principal do Hospital Comarcal de Monforte de Lemos, para esixir á dirección que adopte medidas urxentes nestas situacións para protexer ao persoal e garantir a súa seguridade.
