A circulación ferroviaria entre Montefurado e San Clodio, no tramo Monforte de Lemos-Ponferrada, atópase interrompida debido a un enganchón do pantógrafo dun tren coa catenaria. Así o confirmou o Administrador de Infraestruturas Ferroviarias (ADIF), que sinalou que persoal da entidade traballa para restablecer a circulación canto antes.
Fontes de Renfe sinalaron que o tren afectado por esta incidencia foi o Rexional que cubría a ruta Ponferrada-Ourense. Os viaxeiros xa foron evacuados e trasladados por estrada a destino. Ademais, a interrupción da circulación neste punto obrigou a desviar por outro itinerario cara a León o Alvia A Coruña-Barcelona. Neste caso, os viaxeiros de paradas intermedias son trasladados por estrada.
Así mesmo, estas mesmas fontes explicaron que os pasaxeiros do Rexional que cobre a ruta Vigo-Ponferrada previsto para esta tarde realizarán o percorrido por estrada desde Ourense.
