Rosalía de Castro é a escritora máis representativa da lingua e da literatura galegas e a publicación do seu libro Cantares Gallegos sinala o inicio da restauración do uso escrito do galego e o final de séculos de silencio e esquecemento. Ademais, esa mesma data de publicación foi instaurada pola Real Academia Galega para conmemorar o Día das Letras Galegas.

Desde o século XIX Rosalía de Castro foi homenaxeada polas galegas e os galegos como a gran poeta que nos representa. Non dubidou en exhibir a nosa identidade con orgullo, reclamar o recoñecemento da nosa lingua como expresión xenuína do pobo galego, mostrar a valentía de denunciar a discriminación das mulleres e apostar por unha sociedade libre e igualitaria.

O 23 de febreiro é a data na que se celebra o ‘Día de Rosalia’, o Concello de Quiroga lembra a súa figura cunha charla divulgativa dirixida ao alumnado de Primaria do CEIP de Quiroga. A encargada de impartila será a escritora quiroguesa Celia Díaz Núñez. A organización corre a cargo da Concellería de Educación, Infancia e Igualdade e da Concellería de Dinamización Lingüística; contando coa colaboración do CEIP de Quiroga e dos seus Equipos de Dinamización de Lingua Galega.