Os deputados populares denuncian que esta vía, esencial para a comunicación entre Lugo e Ourense, atópase nun estado de abandono que pon en risco a seguridade viaria dos usuarios. A N-120 carece de calquera alternativa de alta capacidade no tramo que vai desde a cidade de Ourense ata o límite coa provincia de León, atravesando comarcas clave na provincia de Lugo, como Quiroga ou Monforte de Lemos.
Lembran os populares que a falta de avances na autovía A-76, pola “desidia” do Executivo socialista, obriga a miles de lucenses a transitar diariamente por un firme cheo de fochancas. “A situación empeorou de xeito substancial nos dous primeiros meses de 2026 debido aos constantes temporais, que remataron por desfacer o asfalto, xa moi deteriorado”, sinalan os deputados.
A iniciativa recolle testemuños de usuarios e crónicas nos medios de comunicación, nas que se cualifica a circulación por esta estrada como unha “montaña rusa” de saltos e vibracións, especialmente en puntos críticos como o tramo entre a entrada de Quiroga e Abrence. Destacan que as fochancas, en moitos casos sen sinalizar e de gran profundidade, están a causar un “regueiro de incidencias” e avarías diarias. “Hai condutores que sofren rebentóns de rodas e roturas de amortecedores nada máis saír do taller; os talleres da zona incluso están a quedar sen existencias de pneumáticos pola alta demanda de reparacións”, expoñen. Con todo solicitan:
- Un Plan Integral de Rehabilitación que permita a posta en marcha dunha planificación extraordinaria con partidas orzamentarias plurianuais para arranxar o firme, muros, taludes e obras de paso.
- Garantir un mantemento preventivo cunha conservación estrutural e profesional da vía que evite os “parches”.
- Que o Ministerio de Transportes y Movilidad Sostenible asuma a responsabilidade patrimonial para facerse cargo dos gastos de reparación dos vehículos que sufriron danos causados polo pésimo estado da calzada.
“Os lucenses e ourensáns non poden seguir xogando a vida e o peto cada vez que collen o coche para ir traballar ou acudir ao médico. É hora de que o Ministerio asuma a súa responsabilidade”, conclúen.
