Sarria acollerá este venres, 6 de marzo, ás 20.00 horas na Biblioteca Pública Municipal Camilo Gonsar, a presentación do libro Memoria de sombra e bosque, primeira novela da autora Estefanía Padullés e publicada por Hércules de Edicións. A entrada será libre ata completar aforo.
Recoñecida pola súa traxectoria na ilustración e o álbum infantil, Estefanía Padullés (Vilada, 1978), autora afincada en Paradela (Lugo), dá un xiro na súa carreira aventurándose no mundo creativo da novela. Tras anos consolidada como autora de literatura infantil, a escritora abre camiño no eido da narrativa xuvenil e de adultos cunha historia que explora a cara máis crúa da adolescencia. “Memoria de sombra e bosque” é unha fábula baseada en casos reais de mozos internados en centros de menores. A través da figura de Alina, unha orfa de quince anos tutelada nun sistema saturado, Padullés aborda o conflito entre o irracional e o establecido, entre a vida e a morte, nunha etapa vital marcada pola fraxilidade e a intensidade emocional. Lonxe da ficción desvinculada da realidade, Padullés traballou con documentación baseada en casos reais para ofrecer un retrato honesto de mozos sinalados como “os outros”.
O obxectivo, explica a autora, é reivindicar a dignidade dos menores que viven baixo tutela institucional e visibilizar a “sombra voraz” que nace da inseguridade e a falta de afecto.
Padullés é Licenciada en Bioloxía e conta cunha prolífica traxectoria editorial traballada dende que vive en Paradela. É autora de títulos como Leopoldo, o pequeno monstro ou A egua de Breogán, entre outros. Con este salto á novela, busca render homenaxe á lectura como ferramenta para comprender as propias emocións e o mundo que nos rodea.
Na presentación deste venres participarán, xunto á autora, Xosé Lois Gutiérrez Faílde, editor de Alauda Negra; César No Cortiñas, responsable da área de Acción Cultural, Xuventude e Política Lingüística do Concello de Sarria; Ana Isabel Vergara López, responsable da área de Políticas Sociais, Igualdade, Saúde, Emprego e Emprendemento Social; e Miriam Alonso Domínguez, responsable da Biblioteca Pública Municipal Camilo Gonsar.
