A secretaria de Organización do PSdeG, Lara Méndez, asegurou que a formación respecta o proceso xudicial aberto pola Fiscalía contra o expresidente da Deputación de Lugo e actual alcalde de Monforte, José Tomé, e indicou que o partido actuará “en función dos acontecementos”.

Así se pronunciou ao ser preguntada pola decisión do Ministerio Fiscal de presentar unha querela contra Tomé, tras recibir unha denuncia por uns feitos que considera “suficientemente determinados” e con “indicios fundados de criminalidade”.

Lara Méndez subliñou que o Partido Socialista sempre anima ás vítimas a denunciar e recordou que, se a Fiscalía actúa, é porque existe unha denuncia previa. “Cando temos coñecemento, sempre animamos a que se produza esa denuncia e, por tanto, hai unha denuncia e a Fiscalía actúa. Agora temos que ser tamén respectuosos cos procesos xudiciais”, afirmou.

Preguntada tamén por se o PSOE deixará de apoialo no Concello de Monforte —onde Tomé, xa fóra das siglas socialistas, goberna como alcalde non adscrito pero co apoio do PSOE—, Méndez sinalou que a formación seguirá a evolución do caso e actuará “con contundencia” segundo se desenvolvan os acontecementos.

Durante a súa intervención, a dirixente socialista lembrou ademais que o proceso aberto a nivel interno contra Tomé quedou suspendido unha vez que o asunto pasou ao ámbito xudicial. “Agora temos que ser, como sempre nun Estado de Dereito, respectuosos coa xustiza e coa presunción de inocencia, e tamén coa oportunidade de que toda persoa poida defenderse”, concluíu.