O PP de Monforte propón que o Concello poña a disposición dos cidadáns os distintos locais e espazos de titularidade municipal sen uso. Un dos exemplos do “abandono e falta de xestión para impulsar a actividade comercial da cidade” por parte do equipo de goberno son os quioscos sitos na Compañía que se atopan pechados na actualidade. Lamentan os populares que non se saquen a concurso, “a pesar de que hai interesados en poder reactivar a actividade nestes espazos”.
Desde o PP nomean tamén o edificio de Expolemos, na N-120, o quiosco do campo do San Antonio, o local do centro do viño que hai anos acolleu un bar e restaurante, ou o local que era restaurante na Praza de Abastos.
Lamentan que haxa edificios sen actividade cando “hai emprendedores que carecen dun espazo e continúan agardando que o Concello axude coa cesión dalgún ou asociacións sen locais onde realizar as súas reunións”.
