A XLIV Feira do Viño de Quiroga celebra este sábado, 4 de abril, a lectura do pregón que terá lugar ás 20:30h no palco do recinto feiral. Este ano cóntase para a ocasión cos actores, Iván Massagué e Edu Soto. Este último tamén cantante e humorista chegou ás nosas vidas fai 20 anos a través da pantalla de televisión con Andreu Buenafuente e acompañado de personaxes fantásticos como O Neng de Castefa.

Edu Soto chegou a Quiroga este venres, quere empaparse da terra e da xente para preparar o pregón do sábado. Asegura que chega con moitas ganas de visitar as raíces dunha amizade, “Estou vinculado con Quiroga por un amigo, Nacho e a súa muller Silvia, son amigos de Barcelona e a familia de Silvia é de aí. Os nosos fillos coinciden tamén e somos como unha familia, queriamos visitar as raíces de Silvia. Sempre se fai máis familiar indo da man con alguén de aí. Tamén o alcalde recibiunos coas mans abertas cando se plantexou a posibilidade”.

Edu Soto asegura que estivo noutros puntos de Galicia, pero é a primeira vez que visita Quiroga e a Ribeira Sacra, “Apetecíame moito coñecer esta zona, non teño nada preparado porque primeiro quería vivilo, ver onde estou, quen hai e compartir as vivencias. Eles sempre falan marabillas de aquí”.

Silvia e Nacho contábanlles e ensinábanlles imaxes e vídeos, -“mira onde estamos tedes que vir”. Que lle trasladaban esas imaxes, “unha vida moi diferente á que nós vivimos,…unha vida que coñecemos como espectadores doutros lugares de España. Vidas tranquilas onde todo o mundo se coñece, se es dun círculo próximo recíbente cos brazos abertos. Moita paz, campo, vida familiar…”. O actor asegura que lle gusta o viño e que coñecer Quiroga a e a súa feira lle permitirá alonxarse do día a día na cidade.

Despois do pregón farase a entrega de premios ao establecemento gañador do concurso Val de Quiroga de Tapas e á gañadora do concurso do cartel da Feira do Viño, Antía Rodríguez. Con familia de Quiroga, Antía leva toda a vida vivindo na Coruña, “aínda que sempre volvía cando podiamos e actualmente paso máis tempo en Quiroga que na Coruña”.

Antía Rodríguez

Dedícaste ás artes gráficas ou tes como afección a ilustración e o deseño?

Dende pequena sempre me gustou todo o relacionado ca arte, de feito acudín moitos anos a clase de pintura. Estudei Publicidade, unha carreira bastante creativa, e acabei descubrindo o mundo da ilustración dixital, que agora teño como afección.

Tíñaste presentado antes a algún concurso gráfico?

Á primeira edición do concurso da Feira do Viño de Quiroga, fai xa dous anos.

Como xurdiu, logo, a idea de presentarse ao certame de deseño do cartel anunciador da Feira do Viño de Quiroga?

Tiña a espiña cravada dende facía dous anos, e como o ano pasado non me presentei, este tiña o tempo necesario para dedicarlle ao cartel.

Tiveches clara a proposta final de cartel dende o principio ou décheslle algunha volta?

Primeiro fixen un boceto da contorna de Quiroga, que tiña claro ao cen por cen que estivera representada, e despois, unha vez que fun añadindo cor, viñeron as ideas de nomear ás parroquias e os distintos elementos patrimoniais.

Que queres representar co teu deseño gañador?

Quixen que todos os habitantes do concello se sentisen representados, ao final, aínda que a feira faise na vila de Quiroga, os froitos que a fan posible esténdese por todo o territorio. O viño para esta comarca é unha forma de vida, para a miña familia tamén, e ca contorna do concello como protagonista do cartel quixen representar que é o núcleo da nosa vida e da de todos, aínda cas nosas características propias de cada pobo, somos unha comunidade que forma parte dun mesmo lugar.

Como recibiches a nova e como valoras a repercusión que está tendo na contorna quiroguesa e fóra dela?

Fíxome moitísima ilusión porque para min o feito de que unha ilustración miña represente algo da miña vila é un orgullo tremendo. Estou moi contenta porque recibín persoalmente moitas felicitacións e parece que a xente está contenta e gústalle o cartel que representa a súa feira do viño, que ao final é o máis importante. 

En vista do éxito, presentaraste a máis concursos de carácter gráfico?

Nunca lle din voltas fóra do concurso de Quiroga, pero non descarto probar sorte fóra del.