O CIM Móbil que pasará pola Pobra do Brollón ofrecerá información, asesoramento e acompañamento psicolóxico, social e xurídico en materia de violencia contra as mulleres. O servizo está dirixido a mulleres que o demanden, de forma individual ou colectiva formando parte dun grupo ou asociación de mulleres; e tamén a calquera persoa en xeral, en asuntos relacionados coa información, a atención e a prevención da violencia de xénero.
O servizo CIMs Móbiles que promove a Xunta de Galicia é un recurso especializado para prestar información, asesoramento, atención, orientación e acompañamento psicolóxico, social e xurídico, de forma ambulatoria, en materia de violencia contra as mulleres, naqueles concellos que actualmente non dispoñan dun Centro de Información á Muller (CIM).
O seu funcionamento é itinerante e préstase mediante catro vehículos que se desprazan por todo o territorio da Comunidade Autónoma de Galicia, dotados co correspondente equipamento técnico e humano.
GRUPOS PRIORITARIOS DE ATENCIÓN
Mulleres vítimas de violencia de xénero, así como as fillas e fillos e as persoas menores ou maiores dependentes delas, coa intención de reducir o impacto negativo que produce a situación de violencia nestas persoas.
Mulleres pertencentes a colectivos en situación de vulnerabilidade e/ou risco de exclusión social; e persoas LGTBI, as súas familias e persoas achegadas.
