Este mesmo luns, 13 de abril, a Xunta de Goberno Local aprobou a licitación do contrato para o subministración en réxime de alugueiro das estruturas e elementos necesarios para o desenvolvemento do Festival, que sae a concurso público por un valor estimado de 117.581,75€, ive engadido. O anuncio de licitación publicouse este luns e o prazo para a presentación de ofertas estará aberto ata o día 28 de abril.

O alcalde, José Tomé Roca, apunta que o Festival do Viño da Ribeira Sacra de Monforte de Lemos “é un evento totalmente consolidado no calendario enogastronómico galego e unha cita de referencia para a promoción dos viños da Denominación de Orixe Ribeira Sacra”. O certame conta con participación de ata 30 adegas integradas na e 12 postos de gastronomía local, e compleméntase cun amplo programa de actividades culturais, musicais, catas profesionais e obradoiros infantís de acceso gratuíto.

Deste xeito, o contrato que sae a licitación comprende a totalidade dos traballos necesarios para dotar ao Festival dunha infraestrutura completa, funcional e de calidade. Concretamente, inclúe o deseño da imaxe gráfica, o mobiliario, o subministración e montaxe de estruturas tanto de titularidade municipal como outras necesarias para a celebración (postos de adegas, gastronomía, zonas de recepción, palco, pórtico e zona infantil), as instalacións eléctricas e de fontanería; o subministación de aseos portátiles, e a xestión loxística da montaxe e desmontaxe. Os materiais que non son estruturas propiedade do Concello entréganse en réxime de alugueiro, agás os elementos gráficos (vinilos, lonas e sinalización impresa), que pasarán a ser propiedade do Concello ao remate do evento.

A estética da instalación mantén a liña da pasada edición, madeira en cor natural, cores violetas e elementos máis contemporáneos como son as teas microperforadas personalizadas en estruturas e pequenos xardíns verticais que o converte nun Festival de elite dentro dos eventos do viño. O recinto contará zona de sombreado e tótems informativos co programa de actividades para que o visitante poida pasear comodamente polos stands e seguir o programa de actos. Áreas diferenciadas do Festival do Viño:

• Zona de adegas: 30 adegas participantes en 15 stands dobres.
• Zona de gastronomía: 12 stands de operadores gastronómicos locais e comarcais.
• Zona de recepcións e imaxe institucional: Recepción 1 (atención ao visitante e prensa) e Recepción 2 con Sala de Catas.
• Palco inaugural e escenario de actuacións.
• Pórtico de entrada, photocall e sinaléctica.
• Zona infantil con obradoiros e actividades.
• Zona de servizos: lavado de copas, aseos portátiles e almacéns.

Tal e como explica o alcalde, “o Festival do Viño da Ribeira Sacra de Monforte ten como gran protagonista o viño da Ribeira Sacra, pero con actividades dirixidas a todos os públicos nun entorno natural e apracible como é á beira do Río Cabe, no Paseo do Malecón”. Un evento “imprescindible –engade-, non só no sur da provincia de Lugo, senón  tamén en toda Galicia, e fora das nosas fronteiras, ademais dunha oportunidade para descubrir e sentir Monforte e a Ribeira Sacra a través da súa paisaxe, das súas tradicións, da súa gastronomía e, por suposto, do viño”.