Esta primeira edición nace coa vontade de converterse nun espazo de encontro, celebración e reivindicación da lingua e da cultura galegas, reunindo alumnado dos distintos centros educativos da comarca xunto con persoas usuarias das bibliotecas públicas municipais.

A xornada, que dará comezo ás 11:30 horas na zona recreativa da Piscina Municipal, estará dedicada de maneira especial á figura de Begoña Caamaño, autora homenaxeada este ano o Día das Letras Galegas, sen esquecer a presenza e homenaxe a outras autoras e autores destacados da literatura galega.

Ao longo da mañá, cada centro participante ofrecerá unha actuación propia, configurando un programa diverso e enriquecedor no que haberá propostas centradas na obra e legado de Begoña Caamaño e actuacións musicais, así como actividades inspiradas nas tradicións, na mitoloxía e no patrimonio cultural galego. A celebración rematará cun xantar campestre compartido, recuperando o espírito das romarías populares galegas como espazo de convivencia, cultura e festa.

Con esta iniciativa, que pretende consolidarse como cita anual, o Colectivo Lemos Le, reafirma o seu compromiso coa promoción da lectura, a dinamización cultural e a defensa da lingua galega, facendo da colaboración entre centros educativos, bibliotecas e librarías unha ferramenta clave para fortalecer a identidade cultural da comarca.