A gran noticia do torneo chegou da man de Sara Pérez Pallín, quen se proclamou subcampioa de España na proba de 600 metros lisos. Cun tempo excepcional, a moza promesa da Gándara logrou a medalla de prata tras unha carreira táctica impecable, consolidándose como unha das atletas con máis futuro no panorama nacional.
Pola súa banda, Mencía Álvarez Velasco asinou unha actuación soberbia nos 1.000 metros lisos. Nunha final de altísimo nivel e gran esixencia física, Mencía logrou un merecido quinto posto, sumando uns puntos vitais para o conxunto galego e confirmando a súa gran progresión durante esta temporada.
Desde o Club Atletismo A Gándara expresan o seu “inmenso orgullo” polo papel desempeñado por ambas deportistas. “Esta dobre presenza na elite nacional non só é un premio ao esforzo individual de Sara e Mencía, senón tamén ao traballo de base que o club leva anos realizando en Monforte de Lemos” aseguran.
