Este sábado, 16 de maio, a asociación chantadina Polamiúda celebra na Praza do Cantón unha particular homenaxe a Begoña Caamaño, escritora á que se dedican as Letras galegas 2026. Farán unha lectura pública e compartida de Circe ou o pracer do azul, libro piar do feminismo galego e obra referencial da autora homenaxeada este ano.
A lectura comezará ás 11.00 e durará todo o día, polo que dende a asociación feminista convidan á veciñanza da comarca a animarse a participar e a achegarse a escoitar esa fermosa obra.
Tamén o 16 de maio, ás 20:00 h, a Casa da Cultura de Quiroga acolle unha gala de Corais na que participan o Grupo Vocal Entrelas, formado exclusivamente por voces femininas; Coral Cantar Delas, o único coro de voces brancas da provincia de Lugo; e a Coral Polifónica de Quiroga, fundada en 1991 e que conta actualmente con 30 membros dirixidos por Fernando Sanmartino Pérez.
Para este mesmo sábado 16, o Concello de Taboada acollerá un espectáculo de humor titulado “Risas con perspectiva feminista” que correrá a cargo da compañía Sonia e Serena, formada polas humoristas Jazmín Abuín e Arantxa Treus. Será no Cuartel Vello ás 19:00 h e con entrada de balde. Esta cita, que forma parte da programación feminista da Deputación de Lugo, busca poñer o feminismo ao alcance de todas e todos cun humor comprometido. As humoristas Arantxa Treus e Jazmín Abuín contan cunha ampla traxectoria nos escenarios galegos, combinando monólogos, teatro e televisión cun estilo fresco, próximo e cheo de retranca. Ambas destacan pola súa capacidade para conectar co público a través dun humor actual e reivindicativo, converténdose en dúas das voces femininas máis recoñecidas da comedia en Galicia e moi seguidas en redes sociais.
Rematando axenda do sábado, o Concello da Pobra do Brollón acollerá ás 20:00 h. na Casa da Cultura ‘Olga Novo’ o espectáculo de narración oral de Vero Rilo xunto co músico Luis Iglesias. Trátase de “As Mil e Unha”, unha proposta escénica para público familiar que trata o universo literario da autora homenaxeada nas Letras Galegas 2026, Begoña Caamaño.
DÍA 17 DE MAIO
O Concello de Monforte acollerá este domingo 17 de maio desde as 12.00 horas o Festival Letras Galegas 2026, coas actuacións da Asociación Cultural Amigos da Pandeireta de Monforte e a Coral Polifónica do Concello de Monforte.
Na mesma data o Concello de Taboada ten programada a proxección do premiado filme “Antes de Nós”, dirixido por Ángeles Huerta e que recrea a relación entre Castelao e a súa dona, Virxinia Pereira. Será no Cuartel Vello ás 20:30 h.
