Segundo o PP, o concello solicitara unha subvención para executar a humanización do segundo tramo da rúa da Igrexa. “Con todo, e malia dispoñer de prazo ata finais do 2025 para executar a actuación, o proxecto non chegou a executarse”. Aseguran que se renunciou á axuda pola falta de empresas que concorresen ao proceso de licitación.

Para o voceiro popular, Teddy López, esta situación non é illada e culpan ao goberno local “de non capaz de atopar empresas interesadas en executar este tipo de obras. Isto demostra un problema estrutural na maneira de planificar, dimensionar e xestionar os proxectos municipais”.

O PP advirte de que esta situación “pode repetirse noutras obras e subvencións futuras, o que suporía seguir perdendo financiamento doutras administracións e atrasando ou impedindo actuacións necesarias para mellorar o concello”. O voceiro popular lamenta que “esta renuncia implique non só perder preto de 50.000 euros, senón tamén unha oportunidade real de mellorar unha rúa importante do municipio”.