Durante o acto a Deputada Provincial, Pilar García Porto, estivo acompañada polo presidente do Consello Regulador, Antonio Lombardía Crespo, e o Deputado de Infraestruturas da Deputación de Ourense, Manuel Seoane Rodríguez.

O obxectivo do programa é ofrecer máis ferramentas a un sector que forma parte da identidade e da economía da provincia. “A Ribeira Sacra é unha das grandes fortalezas da provincia de Lugo. Un territorio que soubo converter o seu patrimonio natural a súa tradición vitivinícola e o traballo das súas xentes nun referente de calidade e prestixio”, descatou García Porto.

A Deputación colabora con este proxecto cuncha achega económica de case 50.000€ “porque entendemos que promover o territorio tamén significa apoiar aos sectores que o fan medrar e colaboramos porque achega ferramentas útiles para responder ás necesidades do sector e reforza unha actividade estratéxica para a provincia”.

O obxectivo é impulsar unha transformación tecnolóxica que mellore a competitividade, a eficiencia e a sostibilidade da viticultura da Ribeira Sacra. Esta iniciativa estrutúrase arredor de dúas liñas de traballo complementarias que darán resposta ás necesidades tanto produtivas como administrativas do sector. Por unha banda, inclúese a rede de estacións meteorolóxicas, dispositivos de pequeno tamaño e enerxía autónoma, mediante paneis solares, que permitirán recoller datos climáticos en tempo real para previr enfermidades da vide, planificar tratamentos fitosanitarios e optimizar custos de produción. E, pola outra, a implantación do software ANAWIN, unha ferramenta que permitirá dixitalizar e automatizar todos os procesos administrativos e técnicos da Denominación de Orixe: rexistros, certificacións, rastrexabilidade, facturación ou comunicación con viticultores e adegas.