Este 4 de agosto presentouse no concello de Monforte unha nova edición do Carude Rock, unha cita xa consolidada dentro do calendario musical e festivo da cidade, e que forma parte da programación do Verán Cultural que organiza o Concello de Monforte de Lemos. O festival celebrarase os vindeiros 7 e 8 de agosto, a partir das 20.30 horas, na Praza da Compañía, con entrada libre e de balde.
O Carude Rock converteuse, ao longo destes anos, nun referente dentro do calendario musical da comarca, dúas xornadas de música en directo, convivencia e ambiente festivo nunha contorna privilexiada. A organización anima á cidadanía de Monforte e da comarca, así como ás persoas visitantes, a achegarse os días 7 e 8 de agosto, a partir das 20.30 horas, á Praza da Compañía.
O venres 7, desde as 20.30 horas, contarase coas actuacións de Gato Ventura, Dinosaurios e Extremo (tributo a Extremoduro). O sábado 8, o certame ofrece churrasco e rock’n roll coa participación de Mr. Kamándula e Sr. Salvaje.
