A exposición fotográfica “Gardiáns”, do autor Jorge Arévalo, inaugurouse o mércores 26 de agosto e poderá verse ata o 11 de setembro na Praza Vergara Vilariño de Samos. A mostra propón unha mirada íntima ás razas autóctonas e á profunda conexión entre a xente e os animais da nosa terra.
O traballo diario nas ganderías, a pegada dos animais na cultura, os ciclos vitais ou as consecuencias dos lumes na actividade gandeira son algunhas das temáticas desta exposición que promove a Federación Galega de Razas Autóctonas e financia a Vicepresidencia da Deputación de Lugo.
A exposición, que puido verse ni Vello Cárcere de Lugo e na Sala de Exposicións nos últimos meses, adopta un formato pensado para espazos ao aire libre que facilitan a súa itinerancia pola provincia.
O proxecto naceu da relación de Jorge Arévalo cun gandeiro de cachenas e da súa colaboración coa Federación de Razas Autóctonas de Galicia (Boaga), que fixo posible que razas en perigo de extinción como a Frieiresa, Limiá, Cachena, Loura Galega, Vianesa, Caldelá, Ovella Galega e Galiña de Mós sexan as protagonistas.
Ademais, a mostra explora o animalario do entroido galego, con bois, vacas e ‘pelexos’, centrándose nas tradicións máis próximas e auténticas de lugares como O Courel.
