O potencial turístico de Chantada medrou e diversificouse nestes últimos tempos grazas a ser considerado o concello como ‘Municipio Starlight’. Este verán, por exemplo, programáronse seis actividades vencelladas á observación nocturna do ceo e as estrelas e todas elas tiveron un alto seguimento. En palabras do alcalde, Manuel Manuel Lorenzo Varela: “contamos cunha elevada participación da veciñanza e tamén de persoas de fóra que aproveitaron a súa estancia en Chantada para asistir as actividades ou ben viñeron a propósito porque lles gusta a astronomía. As prazas dispoñibles enchéronse o que demostra o interese no noso ceo nocturno e as potencialidades que nos ofrece”.
A programación comezaba cun obradoiro de iniciación á astronomía destinado a empresarios do sector turístico e emprendedores. Esta actividade estaba orientada a achegar coñecementos básicos sobre astronomía e a favorecer que os profesionais turísticos incorporaran este recurso ás súas propostas e experiencias para visitantes.
Especialmente significativa foi a resposta ao curso de astrofotografía, celebrado este 4 de setembro e co que se pechaba esta programación. A actividade permitiu achegar aos participantes as principais técnicas e ferramentas para captar o ceo nocturno e descubrir as posibilidades que ofrece Chantada para este tipo de fotografía.
VALORACIÓNS
Para o seguimento destas iniciativas desde a Oficina Municipal de Turismo fixéronse enquisas de valoración entre as persoas participantes nas que destacaron a boa acollida das actividades e un notable interese pola astronomía e polo coñecemento do ceo nocturno. “Estes resultados reforzan a aposta de Chantada polo astroturismo como recurso turístico complementario, capaz de diversificar a oferta do municipio, atraer novos públicos e poñer en valor as condicións do territorio para a observación do ceo nocturno”, conclúe o rexedor.
